Advertisement
SKIP THIS
आज:  | Mon, 02, Aug, 2021
FLASH NEWS

ओखलढुङ्गा र भोजपुरको पोल्टामा चौथो अध्यक्षकप भलिबलको उपाधि


समृद्ध अनलाईन १६ बैशाख २०७८, बिहीबार १३:०९ मा प्रकाशित ( महिना अघि) ३३७३५ पाठक संख्या

ओखलढुंगा, बैशाख १६ गते । खोटाङको खोटेहाङ गाउँपालिकामा सम्पन्न चौथो अध्यक्ष कप अन्तर वडास्तरीय भलिबल प्रतियोगिताको उपाधि ओखलढुंगा र भोजपुरले हातपोका छन् । महिलातर्फको प्रतियोगिताको उपाधि ओखलढुङ्गाको मानेभञ्ज्याङ गाउँपालिका–१ मोली र खुला पुरुष तर्फ भोजपुरको षडानन्द नगरपालिका–१ नेपालेडाँडाले हातपारेका हुन् ।
गाउँपालिकाको चौथो वार्षिक उत्सवको अवसरमा आयोजित प्रतियोगितामा भोजपुरकै आम्चोक गाउँपालिका–३ थिदिङ्खालाई सोझो सेटमा हराउँदै नेपालेडाँडाले उपाधिमाथि कब्जा जमाएको थियो भने महिला तर्फ खोटाङको दिप्रुङ चुइचुम्मा गाउँपालिका–५ स–छितापोखरीलाई सोझो सेटमा हराउँदै ओखलढुंगाको मानेभञ्ज्याङ गाउँपालिका–१ मोलीले उपाधिमाथि हात पारेको थियो ।
पुरुषतर्फको प्रतियोगितामा ओखलढुंगाको चम्पादेवी गाउँपालिका–१ पलापु र खोटाङको ऐँसेलुखर्क गाउँपालिका–६ ज्यामिरे तथा महिलातर्फ खोटाङको बराहपोखरी गाउँपालिका–२ सुन्तले र रामप्रसादराई गाउँपालिका–८ बासीखोरा भोजपुरले सेमिफाइनलिस्टमा चित्त बुझाएका छन् । प्रतियोगितामा पहिलो, दोस्रो तथा दुई सेमिफाइनलिष्ट समूहलाई क्रमशः नगद रु एक लाख ११ हजार १११, रु ६६ हजार ६६६ र रु ३३ हजार ३३३ का साथमा ट्रफी, मेडल र प्रमाणपत्र प्रदान गरिएको छ ।
यस्तै विधागत पुरस्कारअन्तर्गत अनुशासित समूहमा पुरुषतर्फ ओखलढुंगाको चम्पादेवी गाउँपालिका–१ पलापु तथा महिलातर्फ बराहपोखरी गाउँपालिका–२ सुन्तले, उत्कृष्ट खेलाडी पुरुषतर्फ षडानन्द नगरपालिकाका सन्दिप कठेत तथा महिलातर्फ आमचोक गाउँपालिकाका ममता राई, उत्कृष्ट लिफ्टर पुरुषतर्फ आमचोक गाउँपालिकाका निशान राई तथा महिलातर्फ ओखलढुंगाको मानेभञ्ज्याङ गाउँपालिकाकी पूर्णिमा बाहिङ राई र उत्कृष्ट स्पाइकर पुरुषतर्फ ओखलढुंगाकै चम्पादेवी गाउँपालिकाको समिप श्रेष्ठ तथा महिलातर्फ ओखलढुंगाको मानेभञ्ज्याङ गाउँपालिकाकी चन्दाकुमारी बस्नेतले हात पारेका छन् ।
चौथो अध्यक्षक कप अन्तर वडास्तरीय महिला तथा पुरुष खुला भलिबल प्रतियोगिताको विधागत पुरस्कारअन्तर्गत उत्कृष्ट समूह तथा खेलाडीलाई जनही रु पाँच÷पाँच हजारका साथमा ट्रफी, मेडल र प्रमाणपत्र प्रदान गरिएको गाउँपालिकाले जनाएको छ । विजयी समूह तथा खेलाडीलाई प्रतिनिधिसभा सदस्य एवम् नेकपा एमाले संसदीय दलका प्रमुख सचेतक विशाल भट्टराईले पुरस्कार प्रदान गरेका थिए । गाउँपालिकाको चौथो वार्षिक उत्सव समापन कार्यक्रममा उत्कृष्ट कृषक, उत्कृष्ट कृषक समूह, उत्कृष्ट पशुपालक समूह, उत्कृष्ट उपभोक्ता समिति, उत्कृष्ट कर्मचारी, उत्कृष्ट शिक्षकलगायतलाई रु एघार हजार १११ सहित कदरपत्रद्वारा सम्मान गरिएको थियो । तीन दिनसम्म मनाइएको वार्षिक उत्सवका अवसरमा विभिन्न जातजातिको सांस्कृतिक झाँकीसमेत प्रस्तुत गरिएको थियो । विश्वभर फैलिएको कोरोना भाइरसको सङ्क्रमण भीडभाडका कारण समुदायमा फैलिन सक्ने सम्भावनालाई ध्यानमा राख्दै स्वास्थ्य मापदण्ड अपनाएर कार्यक्रम सञ्चालन गरिएको गाउँपालिकाले जनाएको छ । प्रतियोगितामा खोटाङ, ओखलढुङ्गा, उदयपुर र भोजपुरका गरी पुरुषतर्फ २३ समूह र महिलातर्फ आठ समूहको सहभागिता रहेको खेल संयोजक एवम् खोटेहाङ गाउँपालिका–२ वाप्लुखाका वडाध्यक्ष दीपेन थुलुङले जानकारी दिए ।